SILAA AMKUBALIGODFREY MGIMWA ASEMA NDIO CHAGUO SAHIHI

Iringa. Mstahiki Meya wa Manispaa ya Ilala jijini Dar es Salaam, Jerry Silaa amewataka wananchi wa Jimbo la Kalenga kumchagua mgombea ubunge wa jimbo hilo kupitia CCM, Godfrey Mgimwa kwa kuwa serikali iliyopo madarakani imeundwa na CCM.

Akizungumza katika mkutano wa hadhara wa kumnadi mgombea wa CCM, Silaa alisema hawana budi kuichagua CCM kwa sababu ndiyo iliyoshika dola kwa miaka mitano 2010-2015.

Alisema kama wananchi wa kijiji hicho na jimbo kwa ujumla wanataka maendeleo ya haraka, lazima waiunge mkono CCM kwa kumchagua Godfrey Mgimwa.

“Wananchi wa Kijiji cha Mgama na jimbo lote, kama mnataka maendeleo kwa haraka ni lazima muichague CCM na siyo chama kingine kwa sababu Serikali iliyopo madarakani ni ya CCM,” alisema Silaa.

Naye mwenyekiti wa CCM Tawi la Ihemi, Greyson Mlowe alimtaka mgombea ubunge katika jimbo hilo kutatua changamoto ya maji katika kata ambapo wabunge waliopita walijaribu kuitatua bila ya mafanikio.

Alisema yeye ni mzaliwa wa Kata ya Mgama kwa muda mrefu , kuna baadhi ya viongozi wamekwenda kuomba kura, lakini walipopata walipotea na kuwaacha wakihangaika na changamoto zao.

Naye Mgimwa alisema atashirikiana na viongozi wa nyanja mbalimbali kuhakikisha anatatua changamoto za wananchi wa jimbo hilo endapo watamchagua.

Alisema kuwa kutokana na changamoto nyingi za wananchi hao, ameamua kutumia elimu aliyonayo ili aweze kuzifikisha kwa viongozi mbalimbali na kupatiwa ufumbuzi.

Uchaguzi huo utafanyika Jumapili ijayo.
CHANZO MWANANCHI